പാവക്കൂത്ത്

By Tulasi Chembakam

ചമയങ്ങൾ ചന്തമായണിഞ്ഞ്

ചരടുവലിക്കൊത്ത്

ശീലയൊന്നിനെ മറയാക്കി ,

ശോഭയെഴുന്നൊരു ചിരാതിന്റെ

പൊൻ തിരിയുടെ വെട്ടത്തിൽ,

നിഴലിൽ നിന്നാടും, പാവകൾ

ആടിടും നടന വൈഭവമിത്.

കൽപ്പിത കാര്യങ്ങളൊക്കെയും

കർണ്ണാമൃതമാക്കുന്നൊരാ -

നിഴൽ കൂത്തതിൽ പാവകൾ

തുച്ഛം സുന്ദരക്കോലങ്ങളായ്

മാത്രം മിന്നിമറയുന്നു.

ഞാനുമിന്നാടിടുന്നൊരു -

"പാവക്കൂത്ത് "

സത്യമെന്തെന്നറിയാതെ,

യവനികയ്ക്കുള്ളിലെ

നിരാലംബയായ് ,ഏതോ

അംഗുലീയ താളത്തിൽ

നിലയറിയാതെ, കഥയറിയാതെ

കാണുന്നോർക്കൊരു കളിപ്പാട്ടമായ് ,വിറയാർന്ന നാളത്തിൻ

പാതി തെളിഞ്ഞൊരു നിഴലിൽ

നിറഞ്ഞാടുന്നു ഞാൻ .

🏵️🏵️🏵️🏵️🏵️🏵️🏵️

തുളസി ചെമ്പകം

By Tulasi Chembakam