చిన్నమాట...పెద్ద ప్రభావం

By Nanubolu Rajasekhar

చిన్నమాట…

జీవితంపై పెద్ద ప్రభావాన్నే చూపించగలదు. 

చిన్నమాట…

రెండువైపులా పదునెక్కిన కత్తిలా... 

మంచీ చేయగలదు, చెడూ చేయగలదు.

చిన్నమాట…

విలువను పెంచగలదు,

ఆ విలువనే తగ్గించనూగలదు.

చిన్నమాట…

స్నేహితులను దగ్గర చేయగలదు,

ఆ స్నేహితుల్నే దూరమూ చేయగలదు.

చిన్నమాట…

వ్యక్తిత్వాన్ని ఆకాశానికి ఎత్తగలదు, 

ఆ వ్యక్తిత్వాన్నే పాతాళానికి దించనూగలదు. 

చిన్నమాట…

బంధాలను ప్రేమతో కలపగలదు,

ఆ బంధాల్నే ద్వేషంతో విడదీయనూగలదు.

చిన్నమాట…

విజయాన్ని అందించగలదు,

ఆ విజయాన్నే చేజార్చునూగలదు.

చిన్న మాట... 

ప్రశాంతతను సృష్టించగలదు, 

ఆ ప్రశాంతతనే ఉద్రిక్తతగా మార్చనూగలదు.

చిన్నమాట...

సత్కారాల్ని చేయించగలదు,

ఆ సత్కారాలనే ఆపించనూగలదు.

చిన్నమాట...

భవిష్యత్తును వెలిగించగలదు, 

ఆ భవిష్యత్తునే ఆర్పివేయనూగలదు.

చిన్నమాట...

నాయకుడిగా నిలబెట్టగలదు, 

ఆ నాయకుడినే పడగొట్టనూగలదు.

చిన్నమాట...

రాజ్యాన్ని నిర్మించగలదు,

ఆ రాజ్యాన్నే కూల్చనూగలదు. 

మాట్లాడే నాలుక అదుపు తప్పితే… 

చిన్నమాటే పెద్ద మాటై,

పెద్ద శిక్షల్నే వేయించగలదు.

అందుకే, 

మాటను పొదుపుగా... 

భాషను అదుపుగా వాడాలి.

By Nanubolu Rajasekhar