જઈ બેઠો

By Vishvas Desai

હકીકતની આ મહેફિલથી ડરીને દૂર જઈ બેઠો,

મનગમતી કલ્પનાઓના ખોળામાં હું જઈ બેઠો.

ફકત એકાંત ફાવ્યું છે મને આ પ્રકાશિત પરિસરમાં,

જરા અજવાળું આવ્યું તો હું અંધારામાં જઈ બેઠો.

હૃદયને સમજાવવાની એ મથામણ ખૂબ નિષ્ફળ ગઈ,

ન આવ્યું આંખમાં આંસુ તો મદિરાલયમાં જઈ બેઠો.

પુરાવા મેં ન આપ્યા આ જગતને મારા હોવાના,

મુખેથી મૌન ધારી લઈ હું શબ્દાલયમાં જઈ બેઠો.

By Vishvas Desai