पंढरीची वारी

By Ameya Bal

टाळ मृदुंगाची| थाप शांत झाली|

वीणा गळ्यातली| विरामली||

सुना दिवेघाट| सुनी पायवाट|

चंद्रभागा काठ| सुना दिसे||

राम कृष्ण हरी| नाम संकीर्तन|

वारीचे रिंगण| कुठे गेले||

हातच्या चिपळ्या| कपाळीचा टिळा|

अन् तुळशीमाला| लुप्त झाल्या?

अकस्मात कैसी |पंढरीची वारी|

अखंड निर्झरी| स्तब्ध झाली||

वैश्विक संकट| पुढती उभे हे|

काही केल्या ते हे| हटेचिना||

काय झाली चूक| घडले का पाप|

ज्यामुळे हा कोप| ओढावला

भक्तांचा कैवारी| तू सावळ्या हरी|

संकटा निवारी| विठुराया||

कितीएक जाती| मरणाच्या दारी|

तूच आम्हा तारी| पांडुरंगा||

ऐकून विनंती| डोळा आले पाणी

बोले गोड वाणी| चक्रपाणी||

किती एक वर्ष| तुम्ही वारकरी|

येता या पंढरी| अखंडित||

काळ असा आला| ज्याने घात केला||

वारीचा पहिला| नेम चुके||

नका करू चिंता| धीर धरा आता

जीवा आटापिटा| करू नका||

ज्ञाना नाम्या तुका| कीर्तनी बोलला|

विसरी का त्यांची| शिकवणी||

पंढरी दिसतो| सर्वा ठायी वसतो|

नाम घेता फक्त| दर्शन दे||

वारी नोहे साध्य| ते साधन होत|

अंतरीची ज्योत| जागी करा||

पंढरपुरात| पंढरी ही नाही|

अंतरंगात पाही| दिसेल ती||

नका शांत करू| टाळ मृदुंगाची थाप|

गा रामकृष्ण जप| मनोमनी||

अखंड ही वारी| खंड तिज नाही|

झाले जरी काही| होणार ती||

एवढेच आता| होईल याबारी|

पंढरीची वारी| मनातचि||

कित्येक शतके| तुम्ही भेट दिली|

आता माझ्यावरी| वेळ आली||

यावर्षी आगळी| पंढरीची वारी|

प्रत्येकाच्या दारी| विठू येई||

By Ameya Bal