Udaan

By Sumedha Gupta

Aap kehte the udne ko aasman tera hai

Mujhe lagta tha aap hi mere nahi ho

Fir bhi aapne apna farz nibhaya

Aur mene apna

Mummy ne apna

Bhai ne apna

Sab apna apna farz nibhate rahe

Apni apni bediyon me ek doosre ko jakad kar

apna apna pyar dikhate rahe

Geele takiyon par khud ko sulate rahe

Ke ek din is pinjare se chutkara milega

Duniya ko apni ankhon se dekhna ka mauka milega

Ek aise savere ka sapna khud ko dikhaate rahe

Toote pankh leke usi aasman me

Me udne ki koshish kar rahi hu

Un bediyon ki gaanthon ko samajh kar

Suljhaane ki koshish kar rahi hu

Kuch gaanthe kathin hai

Kholne me hath chil jaate hai

Aur lahu aankho se behta hai

Kya karoon

Puraane ghaav khul jate hai

Jo maafi kabhi maangi nahi gayi

Vo aankhon me dikhti hai

Haan mene dekhne me der ki

Meri bhi galati hai

Me maaf karti hu

Par aapse ek vinati hai

Ab mujhe udne do

Bediyon ko suljhaane do

Duniya mujhe aapse thodi alagi dikhti hai

Aapne jo socha tha 

Mera aasman usse bhi zyada bada hai

Pankh aur bhi zyada mazboot

Ye yaatra meri apni hai

Padaav mere apne hai

Seekh meri apni hai

Ab udaan mene bhar li hai

Aur aapse ab bandhan ki nahi

Sirf garv ki umeed hai

Mujhe pinjare me vapas mat bulana

Mujhe vo deewaren kuch bhaati nahi hai

Maine ek naya savera paaya hai

Jisne mujhe ye samjhaya hai 

Ke mere pankh toote zaroor hain

Par bade rangeen hain

Aasman me jab ek chitr sa bana dikhe 

Toh samajh jana

Voh sundar rang bhi 

Aap ki hi den hain

By Sumedha Gupta