Tumko Krishan Ban Jana Hoga…

By Jahnvi Gulati

Mai uss desh ki beti hu jaha draupadi ka cheer bachaane

Swayam krishan chale aaye the

Ek naari ke sammaan me bohoto ke rakt bahaaye the

Phir kyu aisa kalyug hai aaya

Chaaro or atyachaar hi chaaya

Maryada purushotam ki dharti par phirse ravan kaha se aaya?

Krishan keh gye hai Geeta me, hum sabme unka ansh vyapt hai

Kya kalyug ki Draupadi ke liye bas itni si baat paryapt hai?

Utho naari ab tumko dikhana hoga

Inn mombatiyo se mon jalaana hoga

Krishan nahi aayenge ab 

Tumko Krishan ban jana hoga…

Mai uss desh ki beti hu jaha dharti ko maa mana jata hai

Bharat ki bhavyata ke baare me ghar ghar me bataya jaata hai

Mai uss bhoomi me rehti hu jo devbhoomi kehlaati hai

Aur Jaha raat ko deviyo ke saath pta nahi kya kya kiya jaata hai

Jaha dosh hmesha kapdo ka ya samay ka bataya jaata hai

Jaha balaatkaari sare-aam ghumta 

Aur balaatkaari ko maarne waale ko jail lejaya jata hai

Mai uss desh ki beti hu jaha betiyo ko kok me mara jata hai

Zinda reh gyi toh sati, warna rape kardiya jata hai

Jaha swapn swapn hi reh jaate, jaha pal me paraya karte hai

Zara se awaaz utha do toh humko dhamkaya karte hai

Bas, 

Ab aur nahi 

Inn devo ki bhoomi parab manavta ka janm hoga 

Utho naari ab tumko dikhana hoga

Inn mombatiyo se mon jalana hoga

Krishan nahi aayenge ab 

Tumko krishan ban jana hoga…

By Jahnvi Gulati