The Perfect Silence

By Inderjot Singh Chadha

“Suzy: Ruchir ,my baby kahan jaa rhe ho?

Ruchir: Baby, going to the gym……

Suzy: Oye tu uth raha hai ki nahi?

Ruchir: Kya hua tumhe achanak??

Suzy: Kitna soyega uth jaaa…..”

Aur isi ke saath ek baar phir mera suahana sa sapna toot gya tha. Ye jo mujhe utha rahe the vo the mere poojya pita ji. Well sapne me aise to kuch bhi baat sacchi to hai nahi as na to meri koi sweetheart hai aur na hi mere pass acchi body hai.

Well first thing ke liye to mere ghar walon ne hi allow nhi karna to sochkr hi guzara karna padta hai but jo second thing hai yaani ki gym jiske liye mujhe daily basis pr hazaron baar sunaya jata hai. Well physique me to mai hu theek thaak sa hi hu thoda bulky but jyada nhi but pta nhi kyu mere parents ko boht problem hai meri is baat se. Yar aap sab khud batao ki ek IT professional kaise khudko technology se door kare aur gym ke chakkar kaate.

Chlo for a change mere parents ne is baar mujhe gym jaane ke liye to nahi bola but unhone us se bhi ek bade torture ki tayaari kr rakhi thi. Jaise hi mai ready hokr neeche dining table par jaa pahuncha vahn mujhpr ye Hiroshima Nagasaki maafik ek bohot bada Atom bomb gira dia aur mujh kaidi ko ye farmaan sunaya gaya ki: “Gaur se sun lo Shehzaade Saleem, agar to tum is ghar me rehna chahte ho to kl subha se tum paas ke park me ek ghante ke liye jogging krne jaoge varna yahan se nikal diye jaoge”. Ek second ke liye to maine bhi socha ki main bagawat kar du apne ghar walo se but phir is Filmy dil ke upper floor pr rehne wale techy dimag ne mujhe samjhaya ki ek ghante ki jogging ke chkkr me kyu khudko beghar karne ka plan bna rahe ho Mr. Saleem , I meant Mr. Ruchir. And ye hai vo kaaran jo mujhe meri zindagi ke us badlaav ki ore le gya.

Chahe mai bilkul bhi subah subah uthne ke haq me nahi tha but pta nhi kyu mujhe ek gut feeling si hui ki I should go, atleast ek din to try karna banta hi hai. Aur isi chakkr me maine vo kadam uthaya jiske vjha se mere phone tak ko shock lag gya. Jis phone ki alarm clock app aajtak unused thi aaj usme subah 5:30 ka ek garma garam alarm set ho gya. Ek baat to vaise kehna wali hai ki kisi se bhi zindagi me badla lena ho to do kaam krdo, pehla use subah subha utha do aur doosra ki uske favorite song ko alarm tune bana do…. Kasam se usko us song se nafrat ho jayegi. Still maine himmat rakhi aur uth hi gaya…. By god ki kasam subha subha ki duniya to normal duniya jaisi hai hi nhi. Mai jaise hi bahar nikla ghar se mera swagat karne ke liye maano khud Pawan Dev khade ho gye aur itni mastr si thandi thandi hava chalne lag gyi. Bas ab aur motivation ki to mujhe bhi jarurat thi nahi aur bas mai chal pada jogging karne.

Pass wala park actually itna pass bhi nahi tha, mujhe 10 min lag gye vahan jaate jaate but ek acchi baat ye thi ki mai tbtk ekdm barhiya se warm up ho chuka tha. Park to yr ekdm hi doosri si duniya ka lag raha tha. Jaise hi maine park ke gate se enter kia mai kya dekhta hu….. ekdum hi brhiya se planatation ho rakhi thi park me. Green grass ke patches aur beech me unke the colorful flowers. In patches par bohot se log alag alag activities karne me busy the. Kuch log mostly vo jo retirement ke darwaze par dastak dene wale the ya de chuke the vo to groups me khade hokr maze se Has rhe the, technical terms me bolu to Laughter Therapy ka anand utha rahe the. Thoda sa aage jaane par mujhe dikhe kuch baccho ke groups jo cricket khelne ki tayario me busy the. Phir aage mai jaise hi gya mujhe dikha ek tiled path jisko mujh jaise logon ke liye banaya gaya tha jo jogging karne ke maksad se aaye the. Bas phir der na karte hue maine jogging karni shuru kar di. Ye pavement kuch is tarah se banai hui thi ki vo poore park ki boundary ke saath hokr ek loop ki trha thi. Bas phir mai bhi ek ghante ka timer set karke is loop ko cover karne nikal pada. Vaise to usually same cheez karne se log bore ho jate hai but pata nahi kyu is park me same logon ko dekhkr bhi mujhe boriyat nhi lag rhi thi but instead mujhe to aur himmat mil rahi thi ki mai apne target ko achieve kar lu.

Chlo kisi trha se maine 6 bje se 6:40 tak jogging ki aur buri trha se thak haar ke mai park ke hi ek bench par apni taqat ikattha karne ke liye baith gya. Do minute to mujhse aankhein bhi nahi khul rahi thi but phir maine aankhein kholi to mere engineer dimag ne bola ki chal boss ab physical exercise bohot hui ab thodi der mental exercise bhi karle aur bas dimag ki baat se cue lete hue maine apne aas pass ke logon ko observe karna chalu kar diya. Bas ab to aisa lag raha tha jaise ki mere dimag ke andar ka koi switch ON ho gaya aur mere saamne ka sabkuch slow motion me chalne lag gya tha. Mai us bench par baith ke har kisi ko dekhta aur phir ek report si tayar karta ki kaun kis tarha ka nature rakhta hoga.

Mere dimag me maine khol di thi apni vo famous diary aur ab mai tayar tha us diary me likhne ko. Aur isi ke saath hi mai kya dekhta hu ki ek aadmi aapne kutte ke saath walk kr raha tha, us aadmi ko dekh kar to lag raha tha ki vo to shayad hawa paani par hi zinda hai aur us kutte ko dekh kar lagta hai ki maalik ke hisse ka raashan bhi yahi khata hoga. Bas ye kam lag raha tha ki maalik kutte ko walk karwane aaya hai balki ye jyada lag raha tha ki kutta malik to walk par laya ho. Mere dekhte dekhte kutte ko kuch dikh gaya aur vo bhagne laga aur maalik me itni jaan na hone ke kaaran vo saath ghasita hua bhaagne laga.

Mai abhi nhi ko dekh raha tha ki mera dhyaan aakarshit karne ko saamne se bacchon ki ek toli nikli. Ye vahi bacche the jo meri park me entry ke tiume cricket khelne lage the. Inke chehron par bohot bachpana tha jiske saath me thodi si chinta bhi thi. Mai abhi chinta ka kaaran soch hi raha tha ki mujhe vo saamne hi dikh gaya. Ek bacche ke haath me maine ek behosh chidiya ko dekha. Vo chidiya shayad inki ball se takra gayi hogi aur behosh ho gyi hogi. Jaise hi vo bacche mere pass se guzre to mujhe ehsaas hua ki ye massom se baccho ke andar bhi kitni sehensheelta hai, jo bade hote hote gayab si ho jati hai.

Phir mera dhyaan saamne se meri taraf aati hui ek aunty par pada aur jabtak mai kuj samajh paata vo aunty mere bagal wali seat par aakr baith chuki thi. Ab aunty ke baare me to kya hi bolu mai, vo to aise lag rahi thi jaise ki Bappi Lehri ke gene kam karwa ke usko ladies jogging suit pehna do. Ek pal ko to mai yahi sochne pe majboor ho gaya ki is aunty ki ek din ki diet se to Anath bacchon ka paet kayi dino tak bhara ja sakta hoga but maine apni soch ko vahin aaraam dete hue apni nazar ghuma di. Ab aise to park me observe karne laayk to bohot log the but meri nazar to aakr us ek larki par ja tiki.

Sach bataun to jaise hi maine use dekha, baaki sab ruk sa gaya. Aisa lag raha tha jaise background me soothing sa instrumental music baj raha ho aur slowmotion me vo larki mere saamne se jogging karte hue nikal rahi ho. Mai to us larki ko dekhta hi reh gaya but vo to maano is sab se anjaan bas apne headphones par gaane enjoy karte hue nikal gyi. Chlo baaki baton se pehle mai us larki ke baare me aapko thodi bata deta hu. Usko dekhkar mujhe aise laga tha jaise ki God ne use normal se thodi extra attention dekar banaya ho. Aise to mai girls ki tareef karta rehta hu but yr usko dekhkar to jaise mera dil ruk sa gaya. Mann to aise kar raha hai ki bas uski tareef hi karta rahu uska figure, jitna maine dekha vo to ek side view sa tha but utne me bhi mera dil to uska deewana sa ho gaya tha. Coming back to the body shape, vo larki bilkul perfect shape me thi na to jyada slim aur na hi jyada bulky. Jogging karte hue bhi uske chehra par thakaan ka nishan tak nahi tha. Frameless glasses saath me JBL ke headphones aur dil churane wala right cheek me ek pyara sa dimple.

Abhi to mai apne sapno ki raani ke khayalon me hi khoya hua tha ki achanak se mere upar ek aadmi aa gira, thodi hosh me aane par maloom chala ki un bacchon me se kisi ek ne kela khakr vahin gira dia tha jispr ki vo mahaanubhav fisal kar gire the. Chot body par to nahi lagi mujhe but chot to gehri lagi thi mere dil me. Mujhe to ye bhi nahin pakka tha ki mai kabhi Anamika , haan haan maine aise hi naam de dia tha apni raani ko, coming back, ye bhi pakka nahi tha ki mai kabhi Anamika ko dubara dekh bhi paunga ya nahi.

Bhagwan ke lekin thode alag hi plans the lagta hai, as 2 minute ke baad hi mujhe phir se Anamika dikhi. Is baar doori jyada hone ke kaaran maine uske front look ko dekha. Pink stripes wale ek baby blue color ke night suit me aayi thi vo jogging karne. Jogging ki vjha se uske chehre par baar baar baalon ki latt ka hamla ho raha tha aur vo kisi masoom bacchi ki tarah bas unhe apne kaan ke peeche ko kar deti. Jaise hi usne mujhe cross kia to maine dekha ki uski waist tak kaali lehrein beh rahi thi. Bilkul sahi samjhe mai uske baalon ki hi baat kar raha hu, but seriously vo bilkul straight bhi nahi the lekin aise the jaise kisi nadi me lehrein si ho. Bas maine socha ki ab to bhagwan meri side se hi batting kar rahe hai to ek aur cheez kyu na maang li jaye aur vo thi ki ek aur baar mujhe ise dekhna hai but lagta hai bhagwan ne retire hurt hone ka plan bana lia. Aein mauke par as usi time mera phone bajne laga aur phone tha ghar se and so mujhe bina time waste kiye vahan se jana pada.

Iske baad to din bhar mujhe Anamika ke baare me sochne ka mauka hi nahi mila as mai apni meetings me itna busy ho gya ki khana khaana bhi yaad nahi raha. Anyways kisi trha se maine apna din as usual boring tareeka se kaat dia but jaise hi mai ghar pahuncha vaise hi subha subha hua sbkuj mujhe yaad aane lag gya aur mai vapis subha jogging jaane ke liye tarasne laga. Ye kuch ghante maine jaagte hue hi ikaal diye as neend ka to aankhon me naam-o-nishaan tk nahi tha.

Kisi trha subha 4 bje meri aankh lag gayi aur jaise hi dubara neend khuli to dekha ki 6 baj gye the. Meri haalaat khrab ho gyi ye sochkr ki kahin Anamika vahan se chli hi na jaye to isliye mai jitna jaldi kar skta tha utna jaldi karke tyaar hua aur jogging ke liye nikal gaya. Vahan mai jb pahuncha to dekha ki mujhse thodi aage hi do larkiya jogging kar rahi thi aur jaise hi unhone loop me turn kia to unke aage mujhe Anamika dikh gayi. Bas phir maine itni tez jogging ki mai Anamika ke pass pahunch gaya, phir maine usko overtake kar liya tha aur uski taraf murh ke ulta bhaagte hue uski taraf ek ring barha di. Bas phir peeche se mujhe kisi ne dhakka dia aur mai apne khayaalon se bahar aaya aur mai vhin khada tha jahan se maine Anamika ko dekha tha aur vo to na jaane kahan ko hi chli gayi thi. Iske baad to maine 40 minute jogging ki but dubara mujhe Anamika dikhi hi nahi.

Pichle din ki trha aaj bhi mai jakar usi bench par baith gaya aur logon ko dekhne laga is ummeed me ki logon ki bheerh me mujhe shayad Anamika bhi dikh jaye lekin aaj lgta hai ki kismat mera saath dene ke mood me hi nahi thi. Bas maine thaan liya ki jo marzi ho jaye abse maine subha time par hi utna hai jogging karne ke liye.

Bas phir maayoos se chehra ko lekr mai ghar ki taraf chal diya, ready hokr ghar se office aur din bhar ek sust sa chehra bana ke ghoomta raha. Kisi trha se ye din khatam hua aur mai ghar aaya. Poore din bhar me mujhse naa jaane kitne logon ne pooch liya tha ki kya hua hai, but mai kisi ko bata hi nahi paaya as sach bolu to mujhe khud hi ye nahi pata tha ki mujhe kya hua hai. Ek anjaan insaan aapki jindagi me inta gehra asar kar sakta hai ye baat soch se pare hai lekin mere case me to bilkul hi sahi hai ye baat as Anamika ko na dekh paane ka hi tha shayad ye gam jo mayoosi ki shakal bnakr poora din mere saath ghoom rha tha. Ghar aakr bhi is gam ne mera saath nahi chorha and isi karan mai bina dinner kiye hi so gaya.

Subha meri neend mere alarm se bhi pehle khul gayi thi aur mai 5:45 hi aaj park me pahunch gaya tha. Ek baat to kehni hi padegi ki park me jaldi aa jao ya kbhi late bhi aa jao lekin log utne hi dikhenge. But phir mere mann me khyaal aya ki logon ka maine kaunsa achaar daalna hai, jisko dekhne ke liye meri nazrein taras rahi thi vo kahan thi. Bas mai jogging kar hi raha tha ki saamne se maine use enter karte hue dekha. Meri already ukhri hui saansein to aur tez ho gayi thi, as Anamika to aaj gazab dhaa rahi thi. Jaise hi vo park me enter hui mai to use hi dekhta reh gaya as uski vo lehron si zulfe uske chehra par aa rahi thi aur aur vo jogging karte hue beech beech me unko haath se side kar deti. Uske chehra ko dekh hi raha tha mai ki usne mujhe dekh liya aur mai zara embarrass sa hokr apni jogging me lag gaya. Bas phir to har round ke baad vo mujhe dikh jati aur mai feel feel me ek aur round maarne chal deta. Bas apna orchestra bajvakr mai jaise hi bench par baitha maine dekha ki vo apni friend ke saath mere saamne se nikal kr chli gayi. Yar pakka larkiyo ke andar koi inbuilt sensor hoga jo unhe bata deta hai ki koi unhe dekh raha hai as mai to uske aage nikalne par uski taraf dekh raha tha lekin vo murhkr mujhe hi dekhne lag gayi. Mere chehra ka to rang hi urh gaya aur isi chkkr me hi sahi but uski serious look to dhokha dete hue ek choti si smile bahar nikal aayi, jisko dekhkar meri jaan me jaan aa gyi.

Bas phir roz ki tarah mai office chala gaya aur vahan ki tension me bhi aaj mere chehra par ek choti si smile thi. Kal jo log mujhse mere dukh ka kaaran pooch rhe the vo aaj meri taang kheenchne lag gye ki “Lagta hai Bhabhi ji kl rooth gyi thi aur aaj maan gyi hai tbhi kal dukhi the aur aaj khush ho”. Mai bhi bas unke is sawaal ko enjoy sa kar raha tha aur saath saath me imagination ke andar baithe script writers ko kaam par laga dia ki likh do ek script ki agar Anamika meri hoti to kaise hoti meri zindagi.

Bas phir isi imagination ke chkkr me mai apni meeting me late ho gaya but chlo koi gamm nahi as aaj to apna din hi set hai. Chlo kisi trha se aaj ka din khatam hua aur mai kl subha ke armaan dil me sajaye so gya.

Subha aaj phir me time par uth gaya tha and ready hokr mai park chla gaya. Vahan thodi warm up kia hi tha ki saamne se maine Anamika ko aate dekha. Vo as usual hi sundarta ki moorat lag rahi thi aur mera dil ucchal ucchal ke uski taraf ko jaa rha tha. Kl ke incident ke baad to aise bhi mere andar himmat ka hot air balloon urh raha tha aur maine Anamika ki taraf dekhkr hi kia aur haath hilaya, lekin usne to ek hi jhatke me mere balloon ki hawa hi nikal di as usne meri taraf dekha aur muh morh ke aage nikal gayi. Bas is baat ne mere ittu se dil ke bhi naa jaane kitne tukde kar diye aur maine soch lia ki aisi hi hoti hai aajkal ki larkiya bohot guroor hota hai inme aur bhi naa jaane kya kya.

Apni jogging karne ke baad aaj mai bina bench par biathe hi jaane laga to dekha ki Anamika aur uski friend usi bench par baithe hue hai. But Anamika ka mujhe kia hua ignore mere dil me aag laga raha tha aur bas phir maine unhe ignore kia aur ghar aa gya. Poora din aaj mai gusse me ghooma aur sab parshaan se ho gye ki teen dino me isne to hume teen emotions dikha diye, pehle din dukhi phir agle din khush aur ab gussa. But gusse me hone ki vjha se kisi ne aaj mujhse pange lene ka try bhi nahi kia. Bas phir ghar aakr mai so gaya aur socha ki bas bohot ho gaya abse no morning jogging as na mai jaunga aur na hi mujhe uska chehra dekhna padega.

But as usual Bhagwan ne kaunsa meri sun ni hoti hai as unhone mujhe subha subha phir utha dia and mai bina mann ke jogging karne chla gaya. Aaj to maine na idhar dekha aur na udhar aur seedhe jogging me busy ho gaya. 40 minute ke baad jab mai bench par baitha to mujhe Sharma Ji ne aawaaz lagayi aur poocha ki sab theek to hai as aaj itne dino me pehla mauka tha jab maine unki taraf dekha tak nahi tha. Oh by the way sharma ji bench ke peeche hi ek Chai ki Tappri ke maalik the. Unke paas chai peene to mai bohot pehle se hi aata tha aur jab unhone dekha ki mai ab health ke chkkr me subha bhi aane lag gaya to unhone bohot khushi jatayi thi. Pehle to maine socha ki ignore hi kar diya jaye inko bhi but phir mann me aaya ki inhone kaunsa meri Bhains churayi hai jo mai inse bhi baat na karu to maine baat ko palat te hue bol dia ki aaj thodi jayada ho gaya tha to saans barabar kar raha tha. Bas mai unse baat kar hi raha tha ki itne me Anamika aur uski friend aakr bench par baith gye aur phir uski friend uthkr aai aur Sharma ji ko do chai ka order ka ke chali gayi. Sharma ji to jaise isi ki wait me the, bas uske jaate hi shuru ho gaye ki kitni pyari bacchi hai aur uski dost bhi bohot pyari hai, pichle kayi mahino se vo roz subha jogging par aate aur mere yahan ki chai peete the. Bas phir maine apne gusse ko ek box me band karke dil ke ek andhere kinare me faink diya aur unke saath hi bench par baith gaya, haath me ek pyala chai lekr. Bas phir Sharma ji ki chia ke bahane maine Anamika ki friend ko hi kaha aur phir himaat juta kar maine Anamika ko bhi hi bola. Usne kaano me headsets lagaye hue the isliye usne sirf nod kia aur phir apne songs aur chai me kho gayi. Maine apna dhyaan phir uski friend ki taraf kia to mujhe ehsaas hua ki Anamika ko dkehne ke chkkr me maine kabhi uski friend Riddhima ko to dekha hi nahi tha. Ye baat nahi ki maine direct hi naam poocha but mujhe yaad aa gya ki Riddhima mere saath wali colony me hi rehti hai aur iske ghar bhi gaya hu mai ek do baar kisi kaam se. maine jab use ye bataya to use bhi mere chehra me vo jaana pehchanapan dikhne laga. Mai to abhi aur baat karne ke mood me tha lekin mere mobile ko ye manzoor na tha isliye vo baj pada aur mujhe urgently vahan se jaana pada.

Phir baaki ke din ka to pata sa hi nahi chala as mujhe aaj field me jana tha aur ghar aate aate mujhe kaafi der bhi ho gayi thi. Bas phir maine jaise taise himaat juta ke dinner kiya aur jakr so gaya. Subha meri neend phir khul gayi aur main nikal pada jogging karne, jogging karne ke baad main bench par ye aas lagaye baith gaya ki kal ki trha aaj bhi Anamika aur Riddhima vahan aayege , vaise kl Riddhima se baat to ki but ek cheez poochni yaad nahi rahi aur vo tha tumhara naam Anamika. Chlo main to himaat haar hi chuka tha ki achanak maine dekha ki tum saamne se aai aur bench ke doosre kinare par baith gayi, duniya se anjaan bas apne music ki hi duniya ke khoi hui si. Mai ek minute tak Riddhima ka intezzar sa karta raha but vo aai hi nahi aur phir maine socha ki tumse hi pooch lu ki Riddhima kahan gayi hai lekin is se pehle ki mai pooch pata ek moti si aunty humare becch me aakr baith gayi. Ab vaise to mai logon ki body ke baare me kuj nahi bolta but aaj jo aunty becch me aakr baithi thi vo to kisi Sumo se kam nahi thi aur bas “dil ke Armaan aansuon me beh gaye” vaise itna bhi senti nahi hua tha mai but still tumse baat karne ka mauka haath se chala gaya to dukh to hua mujhe. Maine to soch lia tha ki Amitabh style me Aunty ke aage jakr shuru ho jaun “ Aaaj khush to bohot hogi aap aunty, jis larke ne aajtak kisi larki ki taraf attachment nahi hone di , aaj vo jab kisi ke kareeb jane ki try kar raha tha to beech me taang arha di” but maine apne andar ke filmy bhoot ko shaant kia aur bas Anamika ko bye karte hue vahan se nikal gaya. Jaate hue maine us aunty ko ghoor ke dekha but unke andar ke sensor ne unhe shayad indication de di aur bas unhone mujhe ghoora aur mera poora rang utar gaya. Bas phir kya tha mai kisi ghabraye hue kutte ki trha vahan se bhaag khada hua.

Aaj almost Anamika se baat ho hi gayi thi , bas yahi khayal mann me liye maine kisi trha se office me entry maari. Mai to bol raha by God ki kasam agar mere pass koi remote hota time control karne keliye to mai daily din bhar ko skip deta bas subha ka vo park ka time hi play karta rehta. But unfortunately ye possible nahi hai isliye mujhe office ka kaam bhi karna parta hai jiske burden me to mai Anamika ke khayaalo se bhi bahar nikal aata hu. Bas kisi trha se aaj ka hectic din kahatam hua aur maine socha ki kal subha to hgar haalaat me mai Anamika se baat karke hi rahunga, aur isi determination ke saath mai so gaya.

Subha tak by God’s grace vo determination kaayam thi aur maine jogging karne ke baad Anamika aur Riddhima ki wait shuru kar di. Kareeb das minute tak ek sniper ki tarah mai sabko dekhta raha but na to Anamika dikhi aur na hi Riddhima but phir achahnak hi jaise kahi se Anamika saamne prakat ho gayi aur bench par aakr baith gayi. Kl ke aunty wale haadse ke baad se to mujhe dar hi laga hua tha ki koi aur na aaj Kabaab me Haddi ban jaye but mere isi khayaal ke dauraan ek bacha hum dono ke beech me aakr baith gaya. Kl ki trha phir mere dil ka stereo sad song play karne hi wala tha ki mujhe ek idea aaya aur maine us bacche ko bola ki beta vo dekho vahan se aate hue aapki pocket me se kuch gir gaya tha aur vo uth kar jaise hi dekhne gaya maine fatafat se Anamika ke saath vali jgha par “Kabza:The Mafia Raaj” kar diya. Vo bacha jaise hi vapis aaya apni seat ko par Kabza dekhkr vo rone lag gaya. Badi mushkil se maine use behlaate hue use side wali sea par bitha dia and finally Anamika ke saath aakr mai baith gaya.

Ab jitna stud bankr maine uske pass baithne ki planning ki thi utna hi bewakoof feel ho raha tha mujhe as mere muh se ek shabd nahi nikar raha tha ab. Phir maine apni dhuvidha ke samadhaan ke liye apne sabse trusted source ko contact kia aur vo tha mera engineer wala dimaag. Bas dimaag apne kaam par lag gaya though usne pehle to bohot bola ki beta “ Bus , Train aur Larki , inke peeche kabhi na bhaago. Ek jayegi to doosri aayegi” but maine beech me hi usko rok dia aur daant te hue boldia ki solution nikal as “tera kaam sirf solution nikalna hai , pyar and all tere liye out of Syllabus topics hai” bas phir usne mujhe solution de diya and that was to type everything till I get comfortable enough to talk to her. Bas maine dimaag ki advice le li, phone uthaya aur note making app me likh diya “ hi, I’m Ruchir”. Darte darte maine uski taraf phone pass kiya lekin usne bohot calmly mera message parha aur phir type karne lagi ”Hey!!!!! I’m Shreya”

Bas phir maine finally Anamika ke name plate ko hata diya aur vahan Shreya naam set kar diya.

Me:”Aur kaise ho aap?”

Shreya:”Mai acchi hu aap btao”

Me :”Mai bhi sahi hu….Achha aapki friend Riddhima nahi aa rahi do dino se, kahan hai vo?”

Shreya:”Han vo uske ghar me kisi ki marriage ka function chal raha hai isliye vo aa nahi paa rahi”

Me:” oh ok.”

Is se pehle ki mai kuj aur likh paata, office se mujhe call aa gyi aur mujhe naa chahte hue bhi ye message type karna pada “Sorry, urgent piece of work, gotta go. Hope to meet u tomorrow”

Shreya:”Ya sure why not…. Bbye and take care”.

Bas phir to yaar cloud nine se upar kahin nikal gaya as naa sirf aaj mujhe Shreya ka naam pata chal gaya but also aaj us se baat bhi ho gayi. Bhale hi on text , bhale hi mere phone par , but a start is a start and kal ab aur bhi baatein hogi.

Bas us din ke baad to daily hum thodi der aise hi baat karne lag gye, jiske dauraan hum dono ne ek doosre ke baare me thodi jaan liya, thodi ek doosre ki families, hobbies and all ke baare me jaana. Phir himmat karte hue maine likha :”yr aise baat kabtak karenge, if u don’t have a problem to mujhe apna mobile number de do taaki hum araam se whatsapp pr baat kar sake.”

Ummeed to nahi thi mujhe but Shreya pehli baari me hi maan gayi and usne apna mumber type kar diya. Bas phir uske aad maine use pehla message bheja whatsapp par and that was “Hi,this is Ruchir here… plz save my number”. Bas Whatsapp number ke baad to hum dono me baatein aur barh gayi. Himmat chahe dono nahi juttaa paa rahe the ki bolkr baat kar lein but still cha par to ek doosre se kaafi frank ho gaye the hum.

Bas phir maine socha ki ab to finally I should try to talk to her and himmat karte hue maine us se baat karne ki try ki but himmat ne sath nahi diya and mujhe chat se hi santusht hona pada. But maine us se poocha ki kaunsa music sunti ho to usne mere taraf ummeed bhari nazar se dekha aur meri taraf headsets barha diye. Mai samajh sa nahi paaya ki itne sundar chehra par achanak se ye chinta ki silvatte kahan se aa gyi. But still maine headsets liye, aur kaan me lagane se pehle ek message aaya mujhe whatsapp pr.

Shreya:” This would change everything between us…”

Mai samajh sa nahi paya aur maine phir bhi headsets laga liye. Mai expect kar raha tha ki koi mat sa Dhinchak sa gana bajega jo Shreya ki personality ko suit karega but yahan to bilkul sannata tha. Koi awaaz hi nahi thi headsets me. Maine sawaalon se bahri hui aankhon ko jab uski taraf bharhya to kya dkeha ki uski akhiyon me se moti gir rahe the. Pehle to mujhe samajh nahi aaya aur maine pocch aki kya hua rone kyu lag gayi to usne meri taraf dekha aur bas ek ishaare me mere pairon talle se zameen kheench li…

Usne apne kaano aur muh ki taraf ishara kia ki inme kuch nahi hai, yaani ki vo na bol sakti thi aur na sun sakti thi. Mai to ekdm hi uth gaya aur vo aur dukhi ho gayi aur rone lagi. Maine khoyi khoyi haalaat me uske kandhe par haath rakha to usne bhi meri taraf dekha, is ummeed se ki mere chehre me use milega ki ” to kya hua agar tum bol-sun nahi sakti” lekin use to mere chehra par ek shoonya mila. Mai ekdm hakka bakka tha aur bas isi baat par achanak hi vo rote rote vahan se chali gayi.

Jaise hi vo gayi, mujhe hosh aaya aur mujhe realize hua ki kitni badi galti ho gayi thi mujhse aur maine sorry ka message type kia whatsapp pr aur send kar diya. Shreya ne message read kia aur mujhe block kar diya.

Mujhe samajh me hi nahi aaya ki mai karu to kya karu. Agle do din mai subha uski wait karta raha with an envelope in my hand, lekin vo nahi aayi. Teesre din bhi mai niraash hokr lautne laga tha ki tbhi vahan par Riddhima aayi aur maine poocha use ki Shreya kahan hai.

Riddhima:” Mujhe nahi pata yr , do din se na mili hai aur na hi kisi message ka reply kar rahi hai”

Phir maine Riddhima ko bataya ki kaise achanak mujhe jab Shreya ki disability ka pata chala to mai shock ho gya aur isi shock ne use mujhse hamesha ke liye door kar diya. Riddhima ne araam se sab suna aur bina koi opinion rakhe bas itna hi bola

“Now What!!!”

Maine use envelope dete hue bola ki bas ise Shreya tak pahuncha do baaki Uss upar wale ki marzi, aur mai vo envelope Riddhima ko dekr vahan se chala gaya.

Us envelope me maine likha tha ki:

“Yr I’m sorry ki us din mai itna shocked sa behave kar raha tha but aaj mai tumhe ye batana chahta hu ki kaun kehta hai ki tum bol nahi sakti, tumhari saanson me mujhe lavz sunai dete hai. Kaun kehta hai ki tum sun nahi sakti,us din meri chuppi me bhi tumne sab sun liya tha. Yr Shreya I like u paagal… I don’t really care ki tum mujhe sun sako ya mujhse kuj bolo ya nahi, mai to bas yahi chahta hu ki tum mere honthon par lavzon ke aane se pehle sab samajh jao. Mai chahta hu ki bina tumhari kuch bhi kahe mai tumhari aankhon se hi sab samajh jaun.

Kaun kehta hai ki tum bol ya sun nahi sakti… is duniya me har vo insaan jiske zindagi me pyaar nahi hai, asaliyat me to vo hai jo bol ya sun nahi sakte.

Your silence is the voice that I want to hear as it is what stirs my cold heart to a warmth ive never seen before.

Please I want u to stay and become one whom I want to meet each day….

Please aaj shaam 6 bje park aa jana vahi Sharma Ji ki Tapri ke pass, Haan kaho ya naa… You’ll always be special for me…

Tumhara Ruchir…”

Bas phir 6 bje tak ka intezaar to jaise 6 janmon ka ho gaya tha. Mai 5 bje ka hi park ke aas pass chakkr kaate jaa rha tha. Phir jaise hi 6 bje mai Sharma ji ki Tapri par pahunch aur nervous sa hokr baith gaya. Phir time beet ta gaya…6:30 phir 7 but maine himmat nahi chorhi. Phir 7:30 bajte bajte meri himmat ne bhi jawaab dene shuru kar diya as mere dil me negative khayaal aane lag gaye ki shayad meri zindagi me Shreya thi hi nahi aur bhi naaa jaane kya kya.

Phir 7:45 tak bohot andhera ho chuka tha aur mai uthkr jaane laga to dekha ki saamne se do parchaiyan meri taraf aa rahi thi aur jaise hi uncle ki tapri ki light me aai to maine dekha ki saamne Shreya aur Riddhima aa rhe hai, mujhe dekhkr Riddhima to side ko ho gayi.

Phir mai aur Shreya aamne saamne khade the…humare beech me koi lavz nahi the kehna ko … tha to bas ek…. The Perfect Silence…..

Bas itni si the ye kahani…

By Inderjot Singh Chadha