Namakool Zindagi

By Shreya Sharma

Ye zindagi badi hi namakool hai,

Kabhi hasati hai toh kabhi rulati hai.

Lekin apni chhoti-si hasrat mein hi,

Anek utaar-chadhaav dikhati hai.

Maine socha tha haste-rote,

Chhoti-si hi toh zindagi hai… kat jaayegi.

Par mujhe kya pata tha,

Itne kam waqt me ki,

Ye itna kuch sikhla jayegi.

Yun toh zindagi ne mujhe, dikhlaya hai bahut kuch,

Aur shayad sikhlaya bhi kuch-kuch.

Par jo asal seekh ye zindagi mujhe sikhla gayi,

Khud ko jeene ka asal tareeka batla gyi.

Yun toh bade-bade vidwaan,

Humein zindagi ki seekh dete firte hein.

Par ye khud hi is bezubaan parinde ko,

Apni chhoti soch ke pinjron me band karte firte hein.

Esi zindagi humein nhi chahiye,

Jiski bas chaar-din ki dikhavati khumari hai.

Thodi jhalli-si, thodi pagli-si hi sahi,

Par apni ye manmarziyan humein apni jaan se zada pyari hein.

Ye humari chhoti-chhoti manmarziyan, koi khudgarziyan nhi,

Apni is chhoti haseen zindagi ko, jeene ka bas ek tareeka hein.

Ye humari khwaishein, koi gustakhiyan nhi,

Kyuki is poori bedhangi zindagi mein, bas yhi toh humare jeene ka sahi saleeka hein.

Na chheeno humse humari ye manmarziyan humari ye khwaishein…

Kyuki inhi ke bal par toh humne us aasman ko chhoone ka sapna dekha hai.

Jo humesha se us chhoti soch ke kaaran, parde ke peechhe apni khwaishon ka gala ghot-ti aai hai,

Us chhoti-si haseen zindagi ko ek baar fir jeene ka sapna dekha hai.

Agar aaj ek baar fir ye log,

Humari in manmarziyon ko humari gustaakhiyan samajhkar,

Humari ye khwaishein yahin rok denge.

Toh kasam khuda ki, esi namakul zindagi humein nhi chahiye,

Apni is zindagi ka gala hum khud ghot denge!

By Shreya Sharma