Ek Sawaal Mere Dil Ka

By Ruchika Khandelwal

Jaanna chahte ho main thik hu ya nahi?

Jaanna chahte ho mera haal kya hai?

Sach bolo, jaanna chahte ho ki meri muskurahat ke piche main koi gum toh nahi chhupa rahi?

Jaanna chahte ho ki koi aisi baat toh nahi jo mere mann mein hai par main bata nahi paa rahi?

Kya tum sachmein jaanna chahte ho ki main khush hoon bhi ya koi baat hai?

Ki main akeli hoon ya mere koi saath hai?

Jaanna chahte ho ki mere mann bhi kya koi cheekh cheekh ke bahar aana chahta hua koi raaz hai?

Agar sachmein jaanna chahte ho

Toh ye batao tumhare puchne pe kaisi hoon main,

Aur mere bolne pe ki sahi hoon main,

Tumne kuch aage pucha kyun nahi?

Meri aankhon mein mera gum dhundhke tumne uss andar chipi baat ko khureda kyun nahi?

Tumne aage kuch bola nahi,

Tumne mera mann tatola nahi

Jab keh hi rahe ho ki jaanna chahte ho konsa sikka kisi pareshaani ka khanak raha hai mere mann mein

Toh tumne thoda zor deke mujhe, mera raaz khola kyun nahi?

Batao mujhe akhir tumne uss dafa aisa kuch kara kyun nahi

Tumne uss dafa kuch bola kyun nahi?

By Ruchika Khandelwal