Chale Chalo

By Shreya Sharma

Chale chalo tum chale chalo.

Apne Jeevan-rath par chadhkar tum,

Aage hi aage badhe chalo.

Chale chalo tum chale chalo!

Nirbheek hriday dhar saahas tum,

Un angaaron ko paar karo.

Ye raqt-swed par dhyaan na do,

Tum karm nirantar kare chalo,

Apna Naseeb khud likhe chalo.

Girkar fir uthna seekho tum,

Us bhaagya se ladna seekho tum.

Ye haar nhi hai haar abhi,

Jab tak isse kuch seekho tum.

Jo jyoti-punj tum khoj rahe,

Bheetar jhaanko vah swayam ho tum.

Chhod niraasha dar bheetar ka,

Ek aag laga lo jeene me.

Shamma banker jal jaane ka,

Vo junoon jaga lo seene me.

Ye mehnat rang laayegi tab,

Sooraj bankar chamkoge tum jab.

Bas hausla rakh aur paseena baha,

Aniruddh ki tarah chalta hi ja.

Bankar Deepak is duniya ka,

Sabko safalta ka marg dikhaao tum.

Fir saamne aaine ko dekhkar khud,

Khud se... garv se nazar milaao tum.

Prerna bankar ubhroge tum,

Jab is samaaj ke seene me.

Aur khud mehsoos karoge tum,

Tab maza aayega jeene me.

Bas dor thaam us jazbe ki,

Is karm-path par badhe chalo.

Chale chalo tum chale chalo,

Aage hi aage badhe chalo!!

By Shreya Sharma