Akeli Ladkiyaan

By Akeli Ladkiyaan

Sadiyon ke reeti-riwazon ko tod

Khud ki aawaz dhoondne nikal padi main

Duniya ne jo nakshe-kadam samjhaye

Unhe peeche chhod girti sambhalti chal padi main

Par majaal itni meri ki akeli khush reh paaun?

Bachpan se sikhaya mujhe ki aawaz neeche rakho

Jab duniya se nazar milayi toh bole nazar meechi rakho

Bhai ko mili aazadi ko main duur se dekha karti rahi

Aur apni khwahishon ko dil ke kone mein sameta karti rahi

Zamane ne banaya ek aisa khel

Ki mera astitva hamesha ek mard se bandha rahe

Passport mein ya toh naam pita ya pati ka ho

Aur meri pehchaan pe iska hamesha kandha rahe

Kyuki majaal itni meri ki akeli khush reh paaun?

Sadak pe chalte chalte jab ladkon ne bajayi seeti

Sikhaya mujhe ki sar neeche kar ke chup-chaap chalti raho

Achche ghar ki ladkiyaan kaam-kaaj seekhti hain

Apne pati ki achchi biwi banne ki tayyari karti raho

Buzurgon ne samjhaya ki samay par shaadi karna

Zindagi mein har kaam waqt pe hona chahiye

Par jaise hi maine sahi galat waqt ki pehchaan kari

Jhat se sab bole ‘ladki ko itna aazad nahi hona chahiye’

Kyuki majaal itni meri ki akeli khush reh paaun?

Iss peedhi ki pareshaani yahi rahi

Ki ladki ne har jagah ladkon ko di takkar

Par jab waqt aaya shaadi karne ka

Uss bebaak ladki se bola raho sar dhak kar

Kyuki majaal itni uski ki akeli khush reh paaye?

Aaj duniya mein laakhon ladkiyaan tees saal ke upar kunwari hain

Apne reeti-riwazon ke andhkaar mein itne uljhe

Unpe dabaav daalte hue tum bhool gaye ki yeh betiyaan bhi tumhari hain

Maa ki aankhon mein apni beti ko dulhan dekhne ka sapna

Ek beti ke dil mein dard bana panapta hai

Uss beti ki chaah bhi hai ki main dulhan banu

Aur akele mein iss bebasi ka afsaana uske aansuon mein chalakta hai

Jiss beti ko paala itne naazon se

Aaj uska kunwarapan kyu bojh bann gaya

Chahe woh kitni tarakki hi na kare

Kyu uska akela hona afsos bann gaya

Waqt sahi hai ya galat yeh kisne jaana

Apni khushi sabse pehle, uske baad yeh zamaana

Zindagi mein itni khushiyaan feeki padti hain

Kyuki zamane ne sikhaya ki jeevansathi ke bina hain hum adhoore

Toh ab hum ladkiyon ne thaani hai ki dikhayenge hum hain kitne poore

Akelepan nahi apne pyar ke khaatir karenge shaadi

Jo hamari udaan mein saath de, sirf aisa dhoondenge ek saathi

Aur agar nahi mila hamare saath chalne wala koi

Apni khushi ki zimmedari liye

Manayenge zindagi bhar aazadi

Iss zamaane ka meri khushi se kya vaasta

Jab yahi hasta hai dekh ke sabki barbaadi

Ab toh mauka mila hai khud ke liye jeena

Apna astitva banakar maa baap ka chauda karun seena

Kyuki ab majaal itni hai meri ki akeli khush reh ke dikhaungi

By Akeli Ladkiyaan