Abb Mujhse Bardasht Nahin Ho Raha Tha

By Divya Kashyap

“Abb mujhse bardasht nahin ho raha tha.” “Tum hi ho mere beti ke hatyaarey!” keh kar Seema ne Vidhan ke muh par thappad jad diya. “Kaash ki maine uss din………to aaj……meri beti mere sath hoti. Sabkuch meri wajah se hua hai. Theek bola Seema ne….main hi hoon….apni beti ka hatyaara!”

Achanak bus ke ruktey hi Vidhan gehri neend se utha. Insaan dusron ki nazar mein girey toh shayd uth bhi jaaye, par jab voe apni hi nazron mein gir jaaye, toh kahan jaaye. Usne socha ki agar uss din gaadi chalatey waqt agar voe dhyan sadak par rakhta aur jaldi ke chakkar mein truck ko overtake karne ki koshish na karta toh aaj uski beti uske saath hoti. Har waqt yahi glaani usey andar hi andar jalaaye jaa rahi thi.

Aaj ghar chor kar bhi kahan khush tha voh. Voe bas bhag jana chahta tha apni galtiyon se door….kahin bahut door….jahan uske yeh sapne aur uska ateet uska saath chor de. Voh bus se utar gaya. Kuch door chala toe dekha ki ek chota sa bachha aur ek boodhi aurat sadak par se bada sa pathar kinarey par sarkaaney ki koshish kar rahe hain. Voe bhaag kar unke paas gaya aur unki madad ki.

Pathar hataane ke baad jab Vidhan ne pucha “Amma, ye kya karne ja rahi ho….iss umar mein tumhein aur iss chote se bachhe ko chot lag gayi toe kya hoga.” Toe unhone batana shuru kiya “Beta……mera bhi tum jaisa ek beta aur bahu thi. Yahin par kisi pathar se takra ke unki gaadi ka accident hua tha aur main aur yeh chota bachha…..mera pota hamesha ke liye akele ho gaye the.

“Uss din maine apne bete aur bahu ko kho diya tha….par ek vada khud se bhi kiya ki abb kabhi bhi koi aise apne parivar ko nahin khoyega jaise maine khoya.” Keh kar voh vapis sadak ke pathharon ko hatane lag gayi.

Aaj Vidhan ki aankhein khul gayi thi. Usey ehsaas ho chukka tha ki joe kho diya hai uske liye apni baki zindagi kharaaab karna bujhdili hai. Abb voe aage chal pada tha….apne ghar se door nahin….apne ghar ki ore.

By Divya Kashyap