"Aao…Thoda Sambhaal Len Khud Ko…"

By Abhishek Tripathi

Zindigi mein musibaten na ho to zindigi adhoori si lagti hai...

Kuch aisa hi manjar bana, samjhte hain bade mehfoos hain hum in chaar diwari mein...

Is Wabai marz ne to sirf logon ke sharir mein hi jagah banai thi...

Pehle anjaaan, aur ab jaan ke isse apne dilo dimaag mein utaar lia hai humne…

Khabre bhi wahi bata rahi, aur akhbaar bhi wahi sab dikha raha...

Vyapaar ke is hod mein siwaay udaasi aur mayusi ke kuch aur nai sikha raha...

Khauf kahen ya majboori, par aisa lagta hai ki roz inhi khabaron ko sunne aur samjhne ka ye silsila, ab aam ho gaya hai...

Kabhi rishtedaar, to kabhi padosiyon mein maut ki gintiyaan aur haspatal mein bhartiyon ka charcha subaho-shaam ho gaya hai...

Haan maloom hai ki jarurat hai logon ko hamdardi ki...

Haan maloom hai ki aaj jyada jarurat hai ek dusre ke dard ko sunne ki...

Par khayal rahe ki...dard baatne ka matlab ye nai ki dard aur mayusiyat dono par hi haawi ho jaae...

Baaten aisi ho, jo chand palon ke lie hi sahi, par thodi si hansi, thodi befikri aur ankhon mein dher saari ummeed lekar aaye…!

By Abhishek Tripathi