കവിത

By Tulasi Chembakam

ഇന്നലെ

വൃത്തമെന്ന തോതിലൊതുക്കി വാർക്കുമാ -

പദ്യങ്ങളെ താളത്തോടടുക്കി തമ്മിലിണക്കി

പദ പവിഴങ്ങളെ കോർത്തിണക്കി നവവധുവെ -

പോൽ അണിയിച്ചു നിർത്തീടുമീ പൊൻ കാവ്യം.

ഇന്ന്

ഗദ്യരൂപമൊന്നു പല വരികളായ് വെട്ടിയൊതുക്കി

മൃദു ലളിത പരിചിത സ്വരങ്ങളാലൊരുക്കി

അഭിനവ ഭാവനയാൽ ഭംഗിയേറ്റി, മേടയൊരുക്കി

ചിതറുന്ന ചിന്തുകളെ ചാലിക്കുമീ -നവ കാവ്യം.

നാളെ

അടയാള വാക്യങ്ങളനവധി നിരത്തി

അർത്ഥമറിയാതങ്കലാപ്പിൽ കുരുക്കി

ഭാഷയും ലിപിയും അതിരുകളല്ലാതാക്കി

വരികളില്ലാതെ വരകളാൽ ചാരുതയേകുമോ പുതുകാവ്യം ?

ഉദാ :-

ഇന്നലെ -പ്രസൂനമതിൽ മകരന്ദം നുക-

രാനണയും ഭ്രമരം പോൽ ....

ഇന്ന് - പൂവിൽ തേൻ നുകരുമൊരു

കരിവണ്ടിനെ പോൽ .....

നാളെ -🌺🌺🍯🍯🐞🐞

🎶🎶🎶🎶🎶🎶🎶🎶🎶🎶

By Tulasi Chembakam