Papa…?

By Jahnvi Gulati

1. papa…

Kaha chale gye aap?

bahar ki duniya toh waisi hi hai

bas andar ki duniya badal gyi

wahi Mausam wahi baarish

wahi tyohaar wahi khushiya

bas ek chehera gayab hai

mai Khush hoti hu toh galat lagta hai

mai roti hu toh galat lagta hai

mai bahar jau toh galat lagta hai

mai kisi se milu toh galat lagta hai

mai kaam karu toh galat lagta hai

mai kuch na karu toh galat lagta hai

mai kisi ko btau toh galat lagta hai

mai kisi se na milu toh galat lagta hai

mai khud me simatna chahti hu

mai aapse milna chahti hu

mai jaanti hu aap wapis nahi aaoge

par voh waqt phirse jeena chahti hu

yaad hai aap mujhe apne haatho se upar godi utha lete the

mai uss aasmaan me phirse udhna chahti hu

log kehte hai pita ghar ki chat hote hai, par mera pura ghar the aap

mai uss ghar me phirse rehna chahti hu

chalte chalte aap do kadam piche aate the

mai voh muskaan phirse dekhna chahti hu

itni jaldi kyu chale gye aap?

mere kuch sawaal reh gye

aapke kuch jawaab reh gye

aadhe hum reh gye

aadhe aap reh gye

asliyat me toh ab na mil sakenge

khwaabo me milna hi laazmi hai

By Jahnvi Gulati