Ghar

By Shraddha

Pura ghar vaisa hi pada hai

jaisa hum chod ke gaye the

bus yuhi bahar hi toh nikle the

phir pata nahi kya hua

phir pata nahi kaise saari purani batein dheere dheere bahar aa gayi

phir pata nahi kab baat haath se nikal gayi

aur hum ghar wapas aye hi nahi

saari cheeze ghar mein ab bhi vaisi hi padi hai

ab tak humara intezaar kar rahi hai

woh adhoori neend, woh adhe kiye hue kaam

aadha glass pani ka jisse hum dono ne paani piya tha

woh shawl jiske silvato mein hum ab bhi mehek rahen hain

... kahin toh hum ab bhi ek saath hain

By Shraddha