ଭାଷା

By Anjla Paramguru

     ଭାବ ଉଦ୍ରେକ ହେଲେ 

                 ହୃଦୟ କନ୍ଦରେ ,

                 ସ୍ୱତଃ ସ୍ଫୁରଇ ଭାଷା 

                 ମୁକ୍ତ କଣ୍ଠ ସ୍ଵରେ ;

                 ଛନ୍ଦୋବଦ୍ଧ ହେଉ ଅବା 

                 ହେଉ ଛନ୍ଦହୀନ 

                 ରୂପ ନିଏ ଲେଖନୀ ମୁନରେ।

                  ମାନେ ନାହିଁ ବାଧା ଓ ବନ୍ଧନ 

                  ସେ ଯେ ଛଳଛଳ କଳକଳ 

                  ସ୍ଵତଃ ସ୍ନିଗ୍ଧ ସୁଶୀତଳ ମଧୁଝର 

                  ସତେ ଅବା ଅମୃତ ପୟ 

                  ପୁଣ୍ୟତୋୟା ମନ୍ଦାକିନୀର ।

                   କଲ୍ୟାଣମୟୀ  ସେ

                  ବିକିରିତ କରେ ଜ୍ୟୋତ୍ସ୍ନା ଜନହିତେ 

                  ଦଗ୍ଧିଭୂତ ପ୍ରାଣ କ୍ଷଣେ 

                   ହୁଏ ଆହ୍ଲାଦିତ,

                   ସ୍ମିତ ଟିଏ ଖେଳିଯାଏ,

                   ନବଘନେ ଉଦ୍ଭାଷିତ 

                   ଚପଳା ପରାଏ ।

                   ଭାଷା ,-------

                   ଭାଷା ବେଗମୟୀ ,

                    ଆବେଗମୟୀ ସେ

                   ଆବଦ୍ଧିତା ନୋହିପାରେ 

                   ନିର୍ଦ୍ଦିଷ୍ଟ ଏକ ପରିଧି ମଧ୍ୟରେ।

                   ପାଗଳିନୀ ପ୍ରାୟ 

                   ପ୍ରଧାବିତା ସିଏ,

                   ଶୃଙ୍ଗାରିତା ହୁଏ 

                   ଆପଣାର ଛାଏଁ  ।

                   ସ୍ଵତଃ ସୃଜିତା ସେ ତ 

                   ନୁହେଁ ପରାଙ୍ ମୁଖା ,

                   ବାଙ୍ ମୟୀଙ୍କର

                   ଅଟଇ  ବାଙ୍ ମିତା ।

By Anjla Paramguru