नाळ

By Amey Sachin Joag

रूप तव ऐसे मनोहारि जणू नक्षत्रांची माळ

बंध जुळले असे जणु की युगायुगांची नाळ ||धृ||

तुझ्या लोचनी प्रिये दिसती स्वर्गाची ग दारे

तुझियाविना रितेच राहती सारे हे देव्हारे

सदन सजवे, बागही फुलवे हास्य तुझे मधाळ

बंध जुळले असे जणु की युगायुगांची नाळ ||१||

गुलाबासही तव रूपाचा हेवा वाटावा

रातराणीच्याही देही तव गंध दाटावा

खुळा पाय मोगऱ्याचा तवपाठी ओढाळ

बंध जुळले असे जणु की युगायुगांची नाळ ||२||

साक्षीस ठेवून चंद्राला त्या शपथ घेइ चांदणे

पृथ्वीवरती होऊन असले नक्षत्र नांदणे

तेव्हापासून निरभ्र झाले आयुष्य मेघाळ

बंध जुळले असे जणु की युगायुगांची नाळ ||३||

तुझ्या आठवांनी ग शिंपते अंगण मातीचे

नयनदीप तुझे उजळविती घरकुल रातीचे

तुझ्या मार्दवी स्वराने होई सारे घर घायाळ

बंध जुळले असे जणु की युगायुगांची नाळ ||४||

By Amey Sachin Joag