ಎಂಥ ವಿಪರ್ಯಾಸ!

By Archana P. Murthy

ಮುಂಜಾನೆ ನಸುಕು ಹರಿವ ಮುನ್ನ

ಕೆಲಸಕ್ಕೆ ಹಾಜರಿರುವವರು,

ಎಲ್ಲ ಅಂಗಡಿ ಬೀದಿ , ಮನೆ ಮುಂದಿನ ಹಾದಿ

ಗುಡಿಸಿ ಶುಭ್ರಗೊಳಿಸುವವರು.

ಮಳೆ ಇರಲಿ ಬಿಸಿಲಿರಲಿ

ರಾಶಿ ಕಸದ ಮೂಟೆಗಳಿರಲಿ

ಗುಡಿಸಿ ಬಿಡಿಸುವರು

ಬಣ್ಣ ಬಣ್ಣದ ರಂಗೋಲಿ

ನಮ್ಮ ಬದುಕಿನ ಅವಿಭಾಜ್ಯ ಅಂಗ ಈ

ಪೌರಕಾರ್ಮಿಕರು.

ಇರಲಿ ಇವರಿಗೆ

ನಮ್ಮ ನಿಮ್ಮೆಲ್ಲರ ಪ್ರೀತಿಯ ಪುರಸ್ಕಾರ.

ಬೆಳಗಾಗೆದ್ದು ಎಲ್ಲರ ಕಣ್ಣು ತಪ್ಪಿಸಿ

ಕಸ ಹಾಕುವುವವರಿವರು

ಯಾವ ದಾರಿಯಾದರು ಸರಿ

ಬಯಲಿಗಾದರು ಗುಡಿಗಾದರು ಸರಿ

ಮೂಲೆ ದೊರೆತರೆ ಸಾಕು ಕಸ ಒಗೆಯುವವರು

ಮರವಿರಲಿ , ಶಾಲೆ ಆಸ್ಪತ್ರೆ ಎದುರಿರಲಿ,

ಬೆಳೆಸುವರು ಕಸದ

ಪರ್ವತವನಿವರು.

ನಮ್ಮ ನಾಗರಿಕ ಸಮಾಜಕ್ಕೆ ಕಪ್ಪು ಚುಕ್ಕೆ ಇವರು,

ಇರಲಿ ಇವರಿಗೆ

ನಮ್ಮ ನಿಮ್ಮೆಲ್ಲರ ಧಿಕ್ಕಾರ.

By Archana P. Murthy