हात फक्त तुझाच हाती

By Miss. Swarupa Deepak Mule

मनाने टाळण्याचे ; केले शेकडो बहाणे ।

नशिबी होतेच तरी ; तुझ्यावर भाळणे ॥१॥

दमले जेव्हा एकदा ; काढूनी ते पळ ।

मेंदूच्या नकारात अडकलाच ; मनाच्या होकाराचा गळ  ॥२॥

विचारांच्या बागेत उगवले ; एक अल्लड स्वप्न ।

तुझ्या सोबतीत झाले ; दिन-रात्र मग्न ॥३॥

ऐन शरदात जणू ; फुटली नवी पालवी ।

प्रेमवर्षेत भिजण्या ; मन हे आर्जवी ॥४॥

जुना जरी दिनक्रम ; विचलित होई लक्ष ।

हा बदलच देतो आहे ; प्रेमबाधेची साक्ष ॥५॥

आता कशाला आढेवेढे ; कशाला टाळणे ।

हात फक्त तुझाच हाती ; असो किती ही वळणे ॥६॥

By Miss. Swarupa Deepak Mule