प्रेम

By Atharva Arvind Andore

प्रेम. प्रेम म्हणजे प्रेम म्हणजे प्रेम असतं, खरंतर तुमचं आमचं ते कधीच सेम नसतं. प्रेम हे कधी माणसावर, कधी प्राण्यांवर तर कधी एखाद्या वस्तूवरसुद्धा असतं. त्याला मर्यादा नसते तर बांधिलकी असते. ते कधी विश्वासापलीकडे एका आसमंतासारखी मोकळीक देणारं असतं तर कधी अविश्वासाच्या चौकटीत बांधलेलं एखाद्यावर मालकी हक्क दाखवणारंही असतं. डोळे मिटता मनात एखादं गाणंही गुणगुणायला लावणारं असतं तर कधी एखाद्या गाण्यातून तेच डोळे पाणावणारंही असतं. कधी ते विनाशर्त जीव लावणारं असतं तर कधी सोयीस्कररित्या दाखवलं जाणारंही असतं. ते असतं कधी आपल्या आपुलकीमध्ये तर कधी श्रद्धेतही झळकतं. त्याला ये म्हटलं की येणारं नसतं तर न बोलावता मनात घर करणारं असतं. ते दिसतं कधी श्वानांच्या ईमानदारीत तर कधी वासरांच्या डोळ्यांत तरंगतं. हा निसर्ग, ही पृथ्वी, हे जग प्रेम करायला शिकवतं पण आपण आपल्या सोयीने फक्त आणि फक्त त्याचा दिखावाच करतो. कोणाला प्रेम या माणूसजन्मात खरोखर करायला जमतं तर कोणाला त्याचा अर्थही उमगत नाही. कोणी प्रेमाने बरसतं तर कोणी त्याच प्रेमामुळे तरसतं. कधी प्रेम हे नात्यांपलीकडे जाऊन केलेलं असतं तर कधी असलेल्या नात्यांतही ते शोधावं लागतं. म्हणूनच म्हणतो ना, की प्रेम म्हणजे प्रेम म्हणजे प्रेम असतं,खरंतर तुमचं आमचं ते कधीच सेम नसतं..!!

By Atharva Arvind Andore