Tum Mere Dost Ban Jaoge

By Deepak Kumar Jain

Jab sanshay ki dhool ko

Aaene se hataoge,

Phir aankho se meri aankhe padh paoge,

Tab tum mere dost ban jaoge.

Jab mere ankahe shabd sun paoge,

Jab mere sang dosti ki koi dhun gaaoge,

Tab tum mere dost ban jaoge.

Jab khayaloon ke bheed me mera khayaal paoge,

Jab mere sang kuch sapne bun paoge,

Tab tum mere dost ban jaoge.

Jab chaar kadam mere sang chal paoge,

Jab mere saanche me tum dhal jaoge,

Tab tum mere dost ban jaoge.

Jab Jeevan ke kuch pal honge mere naam,

Jaise Sudama ke liya Shyam,

Tab tum mere dost ban jaoge.

Jab shabnam ki boond me khud ko duba paoge,

Beeti kuch baton ko chutkiyon me bhula paoge,

Tab tum mere dost ban jaoge.

Jab unchi tumhari hasrat hogi,

Phir bhi milne ki fursat hogi,

Tab tum mere dost ban jaoge.

Jab duniya ke mele me tum mil jaoge,

Mil kar tum mujhse khil jaoge,

Tab tum mere dost ban jaoge.

Jab mushkilo me mujhe gale lagaoge,

Malaalon me khuch achcha khayal laoge,

Tab tum mere dost ban jaoge.

Jab mere sang kshitij ka chhor dekh paoge,

Ya dilkash wah bhor dekh paoge,

Tab tum mere dost ban jaoge.

Jab baarishon me tum bhig jaoge,

Phir un boondo me apne aansu chupaoge,

Tab tum mere dost ban jaoge.

By Deepak Kumar Jain