Suno! Waada Karo Mujhse

By Soni Singh

Umar khatam hone ko hai,

Zindgi bhi bus ab kuch pal ki hi baaki hai.

Jhurriyaan bhi dekho ab aa hi gayin,

Dekho na zara

Tumhe bhi or mujhe bhi

Sab dhundla dikhne laga hai.

Bus thoda rasta aur,

Fir khatam ho jayega ye safar bhi

Fir chale jayenge hum dono bhi akhir

Is choti si zindgi ka itna lamba safar tay karne ke baad.

Magar suno na! waada karo mujhse,

Ki tum fir miloge

Fir kisi janam me

Suno! Bus wada karo mujhse.

Tum fir se mere banoge

Aur mujhe fir se apna banaoge

Wo kasmein, wo wade

Jo tumne is janam me kabhi kiye the

Unhe fir se mukammal karne

Tum har janam me mere paas hi aaoge.

Ki fir wahi barish hogi,

Fir ye kaynaat hme milaane ke liye sazishen kregi,

Fir tumhare hath me mera hath hoga,

Aur fir

Fir ek baar ek aur safar hum saath tay karenge.

Suno na! waada karo mujhse,

Fir kisi sheher, kisi gali, kisi mohalle me,

Tum miloge

Fir hum yunhi chalte chalte kabhi takrayenge,

Fir nazrein milengi

Aur fir hum yunhi muskurayenge.

Aur fir bus kuch baton hi baaton me

Iqraar hoga, izhaar hoga

Aur fir

Fir pyaar bhi hoga.

Suno na! waada karo mujhse,

Ki tum miloge

Us waadi ke peeche

Ped ke patton ko cheerti huyi jo hawa uthegi

Wo tumhe chookar mujh tak aayegi

Un thandi hawaaon aur un wadiyon ke beech se,

Main tumhe chupke se dekhungi

Aur tum wo apni ungliyon se

Apne baalon ko sehlaate huye dikhoge.

Aur fir main tumhe dekh muskuraungi

Shayad fir mai tumhare paas aakar

Apne dil ki baat kahungi

Aur tum sunkar bus yunhi muskura doge.

Suno na! wada karo mujhse,

Ki tum fir mujhse miloge

Fir kisi janam me

Tum fir se mere banoge

Aur mujhe fir se apna banaoge.

Suno! Waada karo mujhse ki,

Har janam tum mera hone mere paas hi aaoge…

By Soni Singh