Shikayat

By Aakanksha Dubey

Mujhe shikayat tumse nahee hai...

Shikayat unse hai jinhone tumhein bachpan me khilaune todne par daanta nahee....

Wahi aadat barkaraar rahi tumhari...

Fark sirf itna hai ab tumhaare paas khelne ko kuch dil hote hain....

Shikayat tumse nahee hai mujhe....

Shikayat unse hai jinhone tumhein sikhaya

Ladke rote nahee rulaya karte hain.....

Islie ab jab dard se dil bhar aata hai tumhara

Tum apna dard kisi aur ki aansuon me bahaate ho....

Shikayat tumse nahe hai mujhe....

Shikayat unse hai jinhone tumhein sikhaya...

Ki tum hi tum ho.... Tumse behtar koi naheen...

Islie wo agar ek kadam aage badh jaae tumse...

Tum baalon se ghaseet use zameen par patak dete ho.....

Shikayat tumse nahee hai mujhe....

Shikayat unse hai jinhone tumhein sikhaya....

Ki ladko ko dar nahee lagta....

Islie ab jab bhi tum dar jaate ho...

Apna dar chhipane aauron ko daraya karte ho....

Shikayat tumse nahee hai mujhe ...

Shikayat unse hai jinhone tumhein sikhaya...

Ki khataaen chaar diwaro me band

aur rutba zamaane me ho...

Islie tum baazaar me parda chahte ho...

Aur bnd darwaaze k bheetar uska cheer haran karte ho....

By Aakanksha Dubey