Phir Se

By Akansha Goyal

https://youtu.be/qvJfzwIYn5k

Chalo, ek kahaani dohraate hain,

Mai fir tumhe tutkar pyaar karungi

Tum fir ek dafaa mujhe pyaar se tod dena.

Mai fir tumse paagalon ki tarah ishq kar baithungi aur tumse kahungi ki suno, hamesha mera

saath nibhaana.

Aur tum meri jaan, fir ek dafaa, jhutha vaada karke, pyaar se sehlaake, dheere se mujhe

tanha kar jaana!

Bas palatna mat, mai aankhein kholun toh mujhe dikhna mat,

Kasam mujhe iss mohabbat ki, iss baar marham nahi lagaungi, ye ghaav bharne se pehle

mai khud sambhal jaungi.

Tum bas iss baar bhi apna iraada pakka rakhna,

Mai cheekhun, chillaun, roun, tum fir se dil par patthar rakhna!

Tum fir mere pyaar ki tauheen karna,

Mai bhula na sakun fir iss kadar zaleel karna.

By Akansha Goyal