Multiple Sclerosis जीवघेणी भोवंडी

By Namrata Salelkar

म्हजेच हात म्हजेलागीं, बेमानपणा करुंक लागले...

सांगिल्ले कितेंच ते, कानामनार कशेंच घेना जाले...

आपल्याच मनशांकडल्यान, कुडीची जतनाय घेवंक...

म्हाका तांणीं मानार करुन, सामकेच लाचार केलें...

काकुळट कशीच करिनासतना, भोवच किर्मणी करुन,

आजनेरी दाखोवन ते, मनांतल्यान ताळ्यो पेटटाले....

पेश्ट उघडूंक दिनाशिल्ले, ब्रश दातांमेरेन पावयनाशिल्ले...

मोबायल फोडत रावताले, मास्क लावंक मेळनाशिल्लें...

शाबू मुठींत धरुंक, फणी केसार भोवंडावंक,

शीताची उंडी करुंक, रोटयेचो कुडको मोडूंक,

गुळी चिमटेंत काडूंक, उदकाचो घोट घेवंक.

गोजडी आंगार ओडूंक, ग्रिप कशीच घेनाशिल्ले

म्हाका गरजिवंत करुंक, कसले सुख भोगतालें...

म्हजे नकसूद हात, कोणूच नकळो आशिल्ले...

एका बरोवप्याची लेखणीच, नानपयत करुन...

ताच्या काळजार घावे घालून, कितें तांणी मेळयले?

निर्शेवन पळयतालीं, आल्मारीतल्या हारशांतलीं पुस्तकां,

हतांत घेतल्यार लेगीत, पान परतूंक जायनाशिल्लें....

वागरें पडील्ली म्हजी जीण, हुडक्या-हुडक्याचें म्हजें रडें,

हड्ड्यांत भरिल्ले उमाळे, तांच्यामेरेन कित्याक पावनाशिल्लें?

जीव घुस्मटाल्लो, रात-दिस सोसुंक जायनाशिल्ले...

दुयेंसा वाडत रावन, जितेपणात मरण अणभविल्लें...

अवयव सगळे कुडीचे, एकानएक आसातत कामाचे,

लिजात जावं फावना, हें मात खरेंच उमजलें...

घरच्यांनीं, सोय-यांनी, इश्टांनीं, सान तशें व्हडांनी...

तकालस घेवन, आधार दिवन, धीराची उतरां उलोवन...

म्हाका मनशांत हाडूंक, म्हज्या सामकार आयिल्ले...

तांचे समेस्तांचे हांव, काळजांतसावन सासणाचे रीणांत उरतलें...

By Namrata Salelkar