Ladke Rote Nahi

By Kalp Raichura

https://youtu.be/LvGQTZG-PDM

Guhaah hai rona, pochh le aansu, pee ja, dard ko dil mein rehne de, roya agar toh kamzor dikhega, duniya hasegi kya kahegi, chhup hoja, ladke rote nahi…

Paer ki chhoti ungli jab apna chhota sa muh nikaal ke bhidd jaati haina table ke paaye se,qasam se tab bhi rona nikal jaata hai. Kuch log kehte hai ladke rote nahi na hi humein dard hota hai. Dil tutt gaya par ahh na nikali, arey nikli thi, band kamre mein sar pakad ke roye the hum. Haaye barbaad kar do humein aur hum roye bhi na janaab, ye toh sarasar nainsaafi hai.

Kyun chhupkar tu rota hai aur kyun hai khulkar hasta, agar galti se aakh mein aansu aa bhi jaaye, fatt se pochh leta hai, arey behne de, kuch dard azaad hona chahte hai, kyun qaid kare hai aansu apne, kiska darr hai? Arey kiska darr hai?

Baat darasal aisi hai, suna hai maine

Ladke rote nahi, aisa suna hai maine

Sikha hai maine aansuon ko peena

Sikha hai ghut ghut ke jeena

Chehre pe joothi muskaan liye,

Sikha hai andar se rona,

Chahe kitni bhi mushqil mein hu,

mein kisiko bata ta nahi,

zimmedaari nibahaata chala jaata hu,

kisiko bata ta nahi,

kyun nahi bata ta?

Arey bataya toh,

ladke rote nahi, aisa suna hai maine…

Accha agar mein tujhse kahu ki ladke bhi rote hai. Phir? Phir toh mein baht rounga.

Haan toh suno suno ek raaz sunau, ek pate ki baat batau, baat darasal aisi hai, ladke bhi rote hai, arey bhai aansu chhupaane wale

hum kaun hote hai? Har kisi ki tarah hum bhi ek samaan hai, emotions kutt kutt ke bhare hai bas dikhaana nahi aata, aur agar dikha de toh chhupana nahi aata.

Rone se behtar cheez hai koi? Haaye saara dard behh jaata hai aansuon mein. Jab khush hote hai toh haste hai, nikaalte haina apni khushi hasee ke zariye, par jab senti hoke dard sehte hai tab rona allowed nahi hai? Kyun nahi hai? Ghut ghut ke jeena bhi kya jeena hai bhai.

Beh jaate hai aakhon se ashk bankar,

woh dard jo kabhi dafn nahi hote,

Rote hai,

Jab kisi apne ki godi mein sar rakhke sote hai, ladke bhi rote hai….

By Kalp Raichura