Kya Hai Dum

By Virat Mehta

Kya hai dum aap mein,

Ek choti gali mein bhaunkte kutton ke beech se guzar jaane ka

Shaan se eilaan karke apna wazan batane ka

Bin awaaz ke paad ke apna haath uthane ka

Kya hai dum aap mein ek bhadde bhakari ko apne paas bithane ka

Apne door ke rishtedaaron ko saaf shabdon mein ye kehne ka

Ki Zindagi meri hai, jeena mujhe hai, bas ab bahut ho gaya

Ya apne maa baap ko ye batane ka ki wo kitne khaas hain

Ya ye kehne ka ki mummy mera tiffin kho gaya

Kya ye dum is tez jeevan mein dheeme chalne ka

Ya auron ki uplabdhiyon se, unchaiyon se nahi jalne ka

Kisi zaruratmand dost ko udhaar dene ka

Kisi ko bina shart, bewajah pyaar dene ka

Kya hai dum kisi anjaan ladki se shudh hindi mein vartalaap karne ka

Ya ek badi si lambi pankti mein, beintehaan bheed mein, pehle aap kehne ka

Aapki ore Kisi ek tak ghoorte hue ladke ko zor se thappad lagane ka

Ya kisi madadgaar bhale ladke ko dekh kar muskurane ka

Kya hai dum kisi ladki se ye kehne ka ki tum bahut khoobsurat ho

Ya kisi kanjoos dost se ye kehne ka ki mere paise wapas do.

Kya hai dum apna unlocked smartphone laparwahi se apne dost ko dene ka,

Ya kisi ki anjaane mein ki hui galti ko apne sar le lene ka

Ya ye maanne ka ki kahin na kahin sabhi beimaan hain, duniya bhrasht hai,

Lekin us duniya ke hum bhi hissedaar hain, yahi suvidha hai, yahi kasht hai

Kya hai dum akhbaar ke pannon ko palatle hue apna khoon khoulane ka,

Aur uske thande hone ke pehle, apne aas paas badlaav lane ka.

Ya kisi behes mein khud ko galat jaanne pe maafi maangne ka,

Ya zindagi ke khoote pe beizzati ke kuch palon ko taangne ka

Kya hai dum apne se neechon pe na chadhke, unko upar laane ka,

Aur apne se upar waalon ke liye sachhe dil se taali bajaane ka

Kya hai dum apne poore mann se gair mazhabi tyohaar manane ka

Diwali pe Faraz ko aur Eid to Prakash ko ghar bhulane ka

Main koi balshaali nahi, vidwaan nahi, mujhmein jo hai shayad aapse kam hai

Magar yadi upar likhi kuch cheezen aapne ki hain to aap mein wakai dum hai

To doston jaag utho aur poocho khud se, kya hai dum aapmein muskurane ka,

Aur insaanon ki is duniya mein, insaan ko fir se insaan banane ka.

Kya hai dum doston cash deke khaana khaane ka

Aur taali na sahi.. kam se kam ek aadhi chutki bajane ka

By Virat Mehta