General Category

By Namrata Salelkar

मोगाळ इश्ट विठू,

.

कसो आसा ? म्हाका वळखलो? हांव नितू..तुजी भुरगेपणांतली इश्टीण. एका बाकार बसताली मरे आमी? विसरलो? चवथी मेरेन बरोबर शिकली, मागीर तू दुसरेकडेन शिकपाक गेलो आता तूं कोणतरी व्हडलो मनीस जाला अशें कानार पडले. आयकून बरें दिसले.

.

पयरच एका दिसाळ्यांत तुजे नांव वाचलें तातूंत तुवें म्हळें की, तुमकां आनीकय आरक्षण जाय म्हण. कित्याक रे हें? हांव जाणा आमच्या पुर्वजांनीं तुमकां खुब त्रास दिल्ले पुण आता ते सगळे ना न्ही. आमी एकाच बाकार बसून एकामेकाच्या टीफीनातले खाण खालां मरे? आमी असो भेदभाव केन्नाच केलो ना हें तुका खबरना?

.

भौमानेस्त डॉ. आंबेडकरबाबान सांगिल्ले २५ वर्सां मेरेन तुमका आरक्षण वा सवलती दियात म्हण मागीर तुमी तुमच्या पायार उबे रावन आपल्या नातरां-पण्टूरांक सावरतले म्हण आता ही वर्सा देमायज जाली अशे दिसना तुका? तरीपुण हें आरक्षण कित्याक रे?

.

सगळ्यांक समान हक्क दियात मरे?.जण एकल्यान व्यवस्थित अभ्यास करुन बरे मार्कस घेतले वा तांका बरी नोकरी मेळ्ळी हातूत वायट तें किते? परीक्षेक कमी मार्कस पडील्ल्याक कमी टक्के पडिल्ल्याक आरक्षण कित्याक हेच म्हाका समजना. हे कशेंच पटना रे म्हाका. ९० टक्के पडील्ल्याक दोतोर जावपाक मेळना कित्याक तो जनरल कॅटगरीतलो पुण ४५ टक्के पडील्ल्याक दोतोरकेक एड्मिशन मेळटा ताणे दोतोर जावन मागीर त्या पेशंटानी मरप मरे? हो अन्याय जालो ना रे?

.

म्हजी धुव म्हण्टा, "मम्मा, म्हज्या इश्टीणेक कमी मार्कस पडल्यात पुण तें म्हण्टा हांवे ती अमकी-अमकी सर्टीफीकेट लायल्यार म्हाका सायन्सीक एडमिशन मेळतले." पुतोणयी म्हण्टा, "चाची, तू म्हाका अभ्यास कर म्हण कित्याक म्हण्टा गे, आमी कितलीय शिकल्यार आमका खय नोक-यो आसात? एक पोस्ट बी आसतलो जनरल कॅटॅगरीत. आमी फुट्बॉल आमका कोणुय किक मारता." आता म्हाका सांग तांज्यामदीं हो जातीयवाद कोणे तयार केलो? आमच्यामदी अशी फुट पडची न्हय, जातीयवाद तयार जावचो न्ही म्हण देशमोग्यांनी कितले यत्न केल्ले? विचार कर रे हाजेर...

.

अपंगाखातिर वा सामको गरीबांतलो गरीब जाका शिकपाची आवड आसून शिकपाक मेळना अश्यां खातिर आरक्षण आसूंकच जाय, पुण ज्याचे आवय-बापुय बरे जोडतात, भुरग्यांक जाय तें दिवूंक शकतात, तांणी कमी फी भरप आनी जनरल कॅटॅगरी म्हण दुस-या भुरग्यान पुराय फी भरप. हो न्याय सो दिसता तुका?

एकदा मरे एका मेळाव्याक एका मंत्र्याक हो प्रश्न विचारिल्लो. ताचें नांव नाका रे हांगा. तो मंत्रीबाब म्हण्टा, आमी खंय हे सगळे सर्त शी म्हण घेवपाक जाय. म्हाका तांका म्हणन दिशिल्ले, "तुमचीं मतां वतली म्हण तुमीं अशें म्हण्टात. सर्त शी घेवपाक ती किते नाचाची वा पदांची सर्त? तो प्रश्न भुरग्यांच्या पुराय आयुश्याचो." खरे मरे?

.

म्हज्या एका इश्टाच्या चल्याक बारावेक ४५ टक्के मार्कस पडील्ले ते म्हाका खबर आशिल्ले. म्हज्या भुरग्याच्या एडमिशनाक हांव पर्वरे गेल्ले, थंय सगळी लिस्टां लायिल्ली आशिल्ली, पळयत जाल्यार त्या भुरग्याक एलोपॅथीक. हॉमियोपॅथीक. आयुर्वेद, डॅन्टीस्ट, फार्मासी, इंजिनियर अश्या सगळ्या फिल्डात एडमिशन मेळताले पुण तो भुरगो शाणो आपल्याक झेपतलो असो वेगळोच मार्ग आपणावन ताणे दुस-या शिकपी भुरग्याक एक जागो मेकळो करुन दिलो खरेच तोखणाय ताजी.....

.

हांवे मरे हें एका दिसाळ्यांक 'वाचकांचे विचार' आसता पळय तातूंत छापपाक दिल्ले पुण तो संपादक भिलो आपलो पेपर खपचोना म्हण दिसता. तूं हें हाजेर मुजरत वाच हां. हालीं पत्रां बरोवपाची संवय ना रे कितेय चुकल्यार सांबाळून घे. वायट धरनाका रे मनात. तुज्या जापेक रावता.

.

तुजी ल्हानपणांतली इश्टीण,

नितू.

By Namrata Salelkar