Ek Chuski Chai

By Neeta Agarwal Doshi

Ek chuski chai ki keemat tum kya jaano coffee peene waale babu

Ek chai lover ke liye Ishwar ke Ashirwad jaisi hoti hai ek chuski chai

Chai premi ke hothon par chashni si mithas hoti hai ek chuski chai

Har chai premi ki rooh ko taro taza kar deti hai, ek chuski chai

Baarish ki shaam ho ya phir kadakti sardi ki subah

Pakodon ke saath ho ya phir saath ho ek achchi kitab

Akele mein piyo ya piyo kisi ke saath

Sau dawaoon se zyada asardar hoti hai ek chuski chai!

Chai chahe nukkad ki tapri ki ho ya raah chalte dhabe ki

Chai chahe ghar pe bani ho ya kisi five-star hotel mein

Chai chahe ghanto ubal kar bani ho ya phir minto mein

Chai ki patti branded ho ya unbranded

Chai to chai hoti hai janaab

Ubalte pani mein jab who gote lagati hai

Bilkul, Nishchal bhav se, khud berang hokar

Pani mein rang, swad aur Khushboo bikher deti hai

Adrak, elaichi aur masale ke saath bhi uski achchi yaari hai

Bina ghabraye dabaav mein bhi, pateele ke har kone mein

Beparvahi se, Kuch ithlati, kuch bal khati, jhoomti hui,

Swadanusar, Naye roop rang mein dhal jaati hai

Ant mein jab doodh dalta hai

Uska bhi dil khol kar Swagat karti hai

Phir Sabke mel Milap ka aisa sangam hota hai

Ki Chhalni se paar hoti chai

Apni purani pehchan peechche chor

Ek naya avatar le leti hai

Aur jab yeh naye avatar mein, hothon pe lagti hai

Peene wale ke jeevan ko sukoon se bhar deti hai

Ek chuski chai!

By Neeta Agarwal Doshi