Chaand pt1

By Fatema Rajkotwala

Meri raaton ki neend koi chura le gaya hai

Pata nahi kaun hai? Kaha hai?

Shayad, shayad Chaand ho?

Kyuki in bheegi aakhon se

Raat ke andheron me

Khidki ke baahar sar uthakar

Ise hi toh dekhti rehti hu.

Mujhe aksar chaand ko dekh ke sukoon mil jaata hai

Mere akele hone ke ehsaas ko...

Koi baatne wala mil jaata hai.

Chaand hi toh hai, jo mujhe akela, bebas aur gumshuda hone se bachata hai Yahi hai jiske sahare main raatein beeta leti hu

Aur din me uske aane ka besabri se intezaar bhi karti hu

Shayad aaj wahi meri neend chura le gaya ho

Shayad aaj chaand ko meri zaroorat ho..

Kya pata wahi akela mehsoos kar raha ho!

Uske tukdo ko tod ke apne premi ko dene wale toh kayi hai... x2 Shayad aaj unhi bikhre tukdo ko yaad kar, jaag raha ho

Aur shayad main uski "all-time-favorite" saathidaar hu

Jo uske hamgam samajh sake

Chalo agar aaj chaand akela hai...

Toh main uska saath dungi,

Use dilasa dungi ki woh akela nahi!

Uske jaise mere bhi tukde kayi logo me bikhre hue hai

Jo shayad kabhi laut nahi sakte

Magar khush hu ke unka ek chhotasa tukda mere paas bhi hai... Waise hi jaise chaand ke paas har premi ke pyaar ka ek tukda zaroor hai, Humare tukdo se chhota hi sahi, magar hai toh!

By Fatema Rajkotwala