Bin Siyaahi Ke Lakeerein

By Kausar Sultana (Majnooni)

Apko kabhi aisa kuch huwa hay?

Shaayad hua bhi hoga…

Koi bohot he chota sa kaam aap kar rahay hon, bina kuch sochay, ekdum seedha saada sa kaam aur achaanak kuch ek bohot he gehra sa ehsaas khul jaaye..

Qalam utthaai kuch likhnay ko tho siyaahi nahi aayi. Yaad aya ke bohot din se qalam istemaal nahi kiya hay. Baazu mein ek purana sa kaaghaz rakha tha. Uspar mainay bina siyaahi ke qalam se qhaali lakeerein banaaney lagi. Bina sochay ke siyaahi nahi aa rahi hay.. bus lakeerein banaati gayi. Itni lakeerein bangayi ke jab kaaghaz phatney wala tha, tab haath ko roka aur tab socha, chalo nayi sihaayi bhar letey hain.

Kya hum aisay kuch, bina jazbaaton ke lakeeron se, kuch rishton ki kahani, bina sochay, likhtay jaa rahay hain?

Hum kabhi rukkar, naye jazbaaton ki siyaahi bhartay hain?

Apko kabhi aisa kuch huwa hay?

Shaayad hua bhi hoga….

By Kausar Sultana (Majnooni)