മോഹം

By Tulasi Chembakam

                    🧡🧡🧡

മഞ്ഞായ് പെയ്തിറങ്ങിയൊരു

പുൽനാമ്പിൻ തുമ്പിലൂടലിഞ്ഞു

മണ്ണിൽ ലയിക്കുവാൻ മോഹം.

താരങ്ങൾ തിളങ്ങുന്നൊരാ

പൗർണ്ണമി രാവിൽ  മേഘശകല-

മായ് തിങ്കളെ തലോടാൻ മോഹം.

പുഴയുടെ തഴുകലിലുറങ്ങും

കരയിലേതോ ; മന്ദാരം പോലുള്ള

വെള്ളാരം കല്ലാകുവാൻ മോഹം.

വെയിലിന്റെ രശ്മിയാലുരു -

കുന്നൊരു സ്വേദ ബാഷ്പ-

കണമായ് തീരുവാൻ മോഹം .

തീരത്തിനു സമ്മാനമ്മായ് തിര -

നല്കുന്നൊരു, ചിപ്പിക്കുള്ളിലെ

മുത്തായ് ചിരിക്കുവാൻ മോഹം.

മിന്നിമറയുന്ന മിന്നാമിനിയെപ്പോലെ

ഒരു ചെറു വെട്ടം എന്നിലും കൂട്ടായ്

കിട്ടുവാനേറെയുണ്ട് മോഹം .

നടക്കാത്ത മോഹങ്ങളെ; നടക്കില്ലെ-

ന്നറിഞ്ഞിട്ടും വെറുതെയിങ്ങനെ

മോഹിക്കുവാൻ മോഹം.

By Tulasi Chembakam