ചക്രവ്യൂഹം

By Tulasi Chembakam

കലങ്ങളും പലവ്യഞ്ജനങ്ങളും

കൂട്ടുകൂടുന്നൊരീ അടുപ്പിൻ-

വക്കിലായ്, കായ് കനികളും 

പിന്നെ, തവി താളം പിടിക്കുന്ന 

പുക മറകളും നെഞ്ചിടിപേറ്റിടുന്നു.

മേളത്തിമർപ്പിതിലേയ്ക്കായ്

അനുസ്യൂതം ഒഴുകിടുന്ന 

ശാസനകളുമായ് വെന്തുകുഴഞ്ഞി-

രിക്കുമീ ചക്രവ്യൂഹ ചുഴിക്കു-

പേരോ പടിഞ്ഞാറുവാഴും മടപ്പള്ളി.

വന്നുപ്പെട്ടിതിലേയ്ക്കു ഞാനിന്നു-

മാദ്യമുദിച്ചിറങ്ങിയ രശ്മിക്കൊപ്പം.

വെയിൽ ഉച്ചിയിൽ നൃത്തം വയ്ക്കു-

മ്പോഴുമീ പാചകപുരയൊന്നിനെ

ഭേദിച്ചു കരേറാൻ ആവതില്ലെനിക്ക്.

By Tulasi Chembakam